2025 жылғы 11 наурыз күні Білім беруді дамытудың инновациялық орталығы «Жақсы мектеп үшін жаңа мұғалім», «Көктемгі мектеп» кіші жобасы аясында білім алушылардың функционалдық сауаттылығын дамытуға дайындық мақсатында мектеп пен колледж педагогтері үшін оқу сауаттылығы бойынша әдістемелік семинар-практикум өткізді.
Семинар педагогтерге білім алушыларды халықаралық зерттеулерге тиімді дайындау және сыни тұрғыдан ойлауды дамыту үшін қажетті әдістемелік құралдармен қамтамасыз етілді, сонымен қатар әртүрлі типтегі мәтіндермен жұмыс істеу дағдыларын берді. Шара барысында оқу сауаттылығы бойынша тапсырмалар беріліп, педагогтермен бірге талқыланды. Атап айтқанда, факт пен пікірді ажырату, мәтіндегі негізгі ойды түсіну, мәтіннің түрлі бөліктеріндегі деректерді біріктіріп, қорытынды жасау, ақпараттың қаншалықты сенімді, әрі объективті екенін анықтау, автордың ойын қалай жеткізетінін талдап, жасырын мағыналарды анықтауға бағытталған тапсырмалар қарастырылып, жауаптары бойынша салыстырылды. Қатемен жұмыс жасау бойынша әдістемелік ұсынымдар берілді.
